एजेन्सी।पाकिस्तानको अदालतले पूर्वप्रधानमन्त्री इमरान खानको गिरफ्तारीसँग सम्बन्धित सन् २०२३ का दङ्गाहरूका क्रममा हिंसा भड्काएकोमा दोषी ठहर गर्दै धेरै पत्रकार र सामाजिक सञ्जाल टिप्पणीकारहरूलाई जन्मकैदको सजाय सुनाएको छ।
आतङ्कवाद विरोधी अदालतका न्यायाधीश ताहिर अब्बास सिप्राले सुनुवाइ पूरा भएपछि शुक्रबार राजधानी इस्लामावादमा उक्त फैसला सुनाएका हुन्।
अदालतको निर्णय अनुसार दोषी ठहरिनेहरूमा भूतपूर्व सैन्य अधिकारीबाट युट्युबर बनेका अदिल राजा र सैयद अकबर हुसेन; पत्रकारहरू वजाहत सईद खान, साबिर शाकिर र शाहीन सहबाई, टिप्पणीकार हैदर रजा मेहदी र विश्लेषक मोइद पिर्जादा रहेका छन्।
पक्राउबाट बच्नका लागि हालका वर्षहरूमा पाकिस्तान छोडेर विदेशमा बस्दै आएका कारण अभियुक्तहरूमध्ये कोही पनि अदालतमा उपस्थित थिएनन्।
भ्रष्टाचारको मुद्दामा खानको अल्पकालीन गिरफ्तारीको विरोधमा मे २०२३ मा उनका समर्थकहरूले सैन्य अखडा र सरकारी सम्पत्तिमाथि आक्रमण गरेपछि उत्पन्न अशान्तिसँग सम्बन्धित मुद्दाहरूका आधारमा यो सजाय सुनाइएको हो।
त्यसबेलादेखि, पाकिस्तानी सरकार र सेनाले खानको पार्टी र असहमत आवाजहरू विरुद्ध व्यापक दमन सुरु गरेका छन्, जसमा हिंसा भड्काएको र राज्यका संस्थाहरूमाथि आक्रमण गरेको आरोपमा सयौँ विरुद्ध मुद्दा चलाउन आतङ्कवाद विरोधी कानुन र सैन्य सुनुवाइको प्रयोग भइरहेको छ।